Wirja
Fl-1999, il-Parlament Ewropew ta ġieħ lil Louise Weiss billi semma' għaliha l-bini li fih hemm l-Emiċiklu Parlamentari u l-uffiċċji tal-Membri fi Strasburgu. Illum hemm bust tal-bronż ta' Louise Weiss fid-dħul tal-bini.
Dan il-bini ġdid ġie inawgurat mill-President tal-Parlament Ewropew, Nicole Fontaine, fil-preżenza tal-President Franċiż, Jacques Chirac.
Kważi ħamsin sena minn meta ġie stabbilit fil-kapitali tal-Alsace, il-Parlament Ewropew fl-aħħar kellu l-Emiċiklu tiegħu, l-akbar ta' dan it-tip fl-Ewropa.
Estratti mill-inawgurazzjoni tal-bini ġdid tal-Parlament Ewropew "Louise WEISS" fi Strasburgu, 1999
Il-bini Louise Weiss huwa kompletament miksi bil-ħġieġ bħala simbolu tad-demokrazija miftuħa u trasparenti, waqt li d-dehra mhux kompluta tas-saqaf tagħmel referenza għan-natura tal-proġett Ewropew li qatt ma jintemm.
Il-belt ta' Strasburgu rrikonoxxiet lil Louise Weiss bl-inawgurazzjoni tal-"Pjazza Louise Weiss" fl-1989, wieħed mill-ħafna spazji pubbliċi madwar Franza li ssemmew għaliha.
Il-kompetizzjoni annwali Louise Weiss għall-kitba ssir mill-Università ta' Strasburgu għall-istudenti tagħha, u l-Librerija Nazzjonali u tal-Università tal-belt għandha kollezzjoni ta' kotba personali li kienu ngħataw minn Louise Weiss stess.
Mhux 'il bogħod, fil-belt żgħira ta' Saverne, il-mużew għandu wirja permanenti li jirrakkonta l-ħajja ta' Weiss, u l-istatwa tagħha tinsab fil-pjazza prinċipali tagħha.
